Қайси университетларга ДХМ орқали ҳужжат топшириш мумкин?

Ёз мавсуми Ўзбекистонда олий таълим муассасаларига (ОТМ) ҳужжат топшириш, имтихон ва тестлардан ўтиш мавсуми ҳисобланади. талаба бўламан деган ёшлар ва уларнинг ота-оналарини бор диққат – эътибори шунга қаратилади.

Шу сабабли бир неча ойлардан буён интернет, ОАВ ва босма матбуот нашрларида миллий олий таълим ўқув юртларига ҳужжат топшириш тартибидаги ўзгаришлар ҳақида ёзиб келинмоқда.

Давлат хизматлари марказлари (ДХМ) поортали ушбу соддалаштирилган тартиб ҳақида хабар берди.

Муҳим янгиликлардан бири — қатор олий таълим муассасаларга абитуриентнинг жойлашиши ва яшаш жойидан қатъий назар, онлайн тарза my.gov.uz портали орқали ёки ДХМ ёрдамида ҳужжат топшириш имконияти яратилгани ҳисобланади.

Бугунги кунда республикамизнинг ҳар бир туманида 201 та шундай марказлар мавжуд, олис ҳудудлар аҳолиси учун эса ДХМларнинг 50 дан ортиқ шохобчалари фаолият кўрсатмоқда.

Қуйидаги рўйхатдаги ОТМларга ҳужжатни соддалаштирилган тартибда топшириш мумкин:

  1. Тошкент давлат юридик университети;
  2. Қорақалпоқ давлат университети;
  3. Гулистон давлат университети;
  4. Фарғона давлат университети;
  5. Самарқанд давлат университети.

Айтганча, ўтган йили ҳужжатларни тажриба тариқасида қабул қилиш тартиби Тошкент давлат юридик университети томонидан синовдан ўтказилди.

Натижада — мамлакатимизнинг 7 мингдан зиёд оилалари 1,5 миллиард сўмдан ортиқ маблағни тежаб қолишди.

Мутахассисларнинг ўртача ҳисобига кўра, Давлат хизматлари агентлиги томонидан ОТМларга ҳужжатларни топширишнинг соддалаштирилган тартиби жорий этилиши натижасида айнан шунча маблағлар оилалар бюджетида сақлаб қолинган.

Бир қатор ҳужжатлар учун қўшимча ҳаражатлар камайтирилди — 086-сонли тиббий маълумотнома, яшаш жойидан маълумотнома, фотосуратлар, шунингдек, пойтахтга келиб-кетишга ва бу ерда яшаш билан боғлиқ ҳаражатлар қисқартирилди.

Шундай қилиб, Ўзбекистон аҳолиси маблағлари оилавий бюджетда қолиб, қўшимча ҳужжатлар олиш ва университетга келиб-кетиш учун сарфланган қимматли вақти тежалди.

Бугун ДХМлар орқали ҳужжат топшириш учун фақатгина 2 та ҳужжат сўралади:

  • фуқаролик паспорти (паспорт ёшига етмаганлар учун туғилганлик тўғрисидаги гувоҳнома);
  • умумий ўрта таълим (11-синф негизида) ёки ўрта махсус, касб-ҳунар таълими муассасасини тугатганлиги ҳақидаги ҳужжат (иловаси билан).

Имтиёзга эга бўлган абитуриентлар имтиёз ҳуқуқини тасдиқловчи ҳужжатни тақдим этиши лозим.

Давлат хизматлари марказлари орқали белгиланган Олий таълим муассасаларига ҳужжат топширганлик учун, шунингдек давлат хизматлари кўрсатганлик учун ТЎЛОВ УНДИРИЛМАЙДИ!