Ўзбекистонда АҚШнинг White & Case халқаро юридик компанияси ҳуқуқий хизматлар кўрсатишни бошлади

Марказий Осиё савдо ҳамда “Ўзбекистон — Америка” бизнес форумлари доирасида White & Case халқаро юридик компаниясининг офисининг очилиш маросими ва тақдимоти бўлиб ўтди. Бу ҳақда Адлия вазирлиги Жамоатчилик билан алоқалар бўлими хабар қилди.

Қайд этиб ўтиш жоизки, White & Case LLP юридик компанияси 1901 йилда ташкил этилган бўлиб, у дунёнинг 26 та мамлакатида жойлашган 38 та офисда меҳнат қилувчи 2200 нафардан ортиқ профессионал ҳуқуқшуносларни бирлаштиради. Компаниянинг йиллик маблағ айланмаси — 1,5 млрд. АҚШ долларидан ортиқ. 2018 йилнинг январь ойида Тошкентда компаниянинг ваколатхонаси очилган эди, эндиликда ушбу ваколатхона Ўзбекистонда юридик консалтинг хизматларини кўрсатиш ҳуқуқига эга консалтинг компанияси сифатида қайта ташкил қилинди.

Тадбирда иштирок этган Америка — Ўзбекистон савдо палатаси раиси, White & Case компаниясининг Вашингтондаги офисининг катта бошқарувчи ҳамкори Кэролин Лэмм, White & Case компанияси директори Хью Верриер томонидан Тошкентда компания офисининг очилиши компания учун ҳам Ўзбекистонда, ҳам Марказий Осиё минтақасида янги имкониятлар яратиши қайд этилди.

Маросимда Адлия вазири Р. Давлетов ҳамда бошқа вазирлик ва идораларнинг вакиллари ҳам иштирок этишди. Ўзбекистон Республикаси адлия вазири тадбирдаги чиқиши давомида Ўзбекистон пойтахтида White & Case компанияси офиси очилиши миллий компанияларимиз ва хорижий инвесторлар учун уларнинг фаолиятини сифатли ҳуқуқий таъминлаш учун янги имкониятлар эшигини очишини айтиб ўтилди.

Тадбир иштирокчилари компания офисининг очилиши Ўзбекистон ва АҚШ, жумладан, Ўзбекистон Республикаси ҳамда нуфузли “White & Case” халқаро юридик компанияси ўртасидаги изчил, ишончли ва давомли ҳамкорлик натижаси ўлароқ муҳим аҳамият касб этишини таъкидлашди.