Муиджон Тоҳирий Давлат божхона қўмитаси раиси лавозимидан озод қилинди

Ўзбекистон Давлат божхона қўмитаси раиси Муиджон Тоҳирий ишдан олинди. Бу ҳақида қўмита сайтида маълум қилинган.

Маълум қилинишича, эндиликда қўмитага Бош прокурор ўринбосари, генерал-майор Муротжон Бердиалиевич Азимов янги раис этиб тайинланган. Бухоро вилоятининг собиқ прокурори бўлган Муротжон Азимов 2016 йилнинг сентябрида Ўзбекистон Республикаси Бош прокурорига ўринбосар этиб тайинланганди.

Кўп йиллар давомида Ўзбекистоннинг биринчи президенти Ислом Каримов хавфсизлик хизматига раҳбарлик қилган Муиджон Тоҳирий 2016 йилнинг декабрида Зоҳид Абдуқаюмович Дўсанов ўрнига Божхона қўмитаси раисига айланганди.

Унинг истеъфоси сабаби ва кейинги иш жойи ҳозирча маълум эмас. Бундан аввалроқ ОАВда Божхона қўмитасида кенг кўламли текширув ўтказилаётгани ҳақида маълум бўлганди.